அது..

•••


இல்லாதவொன்றை
இருக்கும் என்கிறாய்
இல்லையென்கிறேன் நான்
இருந்தே தொலைக்கிறது அது.


 ••••

நதி !!!

பால்கேனியில் நின்று
தலை சீவுகிறாய்
கீழே விழுகின்றன மலர்கள்.

•••

சீரகச்செயினை
நீ வாயில் கடிக்கும்
தருணமெல்லாம்
தங்கத்தின் விலை உயருகிறது.

•••

ஓடும் அந்த நதியில் 
ஒவ்வொரு கல்லாய் தூக்கிப்போடுகிறாய்..
காலால் நீரை எத்துகிறாய்...
கைகளால் தள்ளுகிறாய்..
மீன்களைப் பிடிக்க தாவணி ஏந்துகிறாய்...
நீர்சுழிகளைக்காட்டி அழகாய் சிரிக்கிறாய்..


ஒரு மானசரோவர் உருவாகிறது.

••••


•

மகரந்தம்

பனியில் நனைந்த
பூக்களையே
வெரித்துப்பார்க்கிறாய்

அவைகளும் அப்படியே
பார்க்கின்றன

பூகோள விதியில்
ஒரு மாற்றம்

உன் மகரந்தம் அதனோடு.

•

பாவம்

‘அவல நெனச்சிட்டு
உரல இடிக்காத’

தவறான வேலைக்கு
அம்மா இப்படித்தான் திட்டுவாள்

நான்
அவளை நினைத்து
உரலானது 
அவளுக்கும்கூட தெரியாது...
பாவம்



•

அழுகிறேன் நான்

 

♫ உனக்கு பிடித்தப் பாடலை 

திரும்பத்திரும்ப  கேட்கிறேன். 

அன்றைய மழைநின்ற இரவிலும்கூட. 

காத்திருந்த கண்களைபோல 

மீண்டும் அழத்தொடங்கியது 

அது.

 

****

அழுகின்ற போதெல்லாம்

அந்தக் குழந்தையை

முத்தமிட்டே கொஞ்சுகிறாய் நீ..

அழுகிறேன் நான்

•

இனியநாள்

பட்டாம்பூச்சி விழித்தபோதுதான்
நீயும் எழுந்தாய்

அது சிறகு விரித்தது
நீயும் சோம்பல் முறித்தாய்

இந்த நாள் இனிய நாள்.

(நன்றி ஆ.வி)


••••••••••••••••
 
நனைதலென்பது

பள்ளிச்செல்லும் சிறுவனை
கூடவே அழைத்துச்செல்கிறாய்
கூடவே வருகிறது மழையும்

தாவணி முனையில்
அவனையும் அணைத்துக்கொள்கிறாய்

நனைகிறேன் நான்.



•